Saturday, June 06, 2009

خطاب أوباما:خداع و خيانة

يعنى كان فى استفزاز قبل قدوم الرئيس الامريكى أوباما عشان اللى شفناه من دولتنا العزيزه فى اعطاء اجازات للناس و قفل المحلات و غيره و تاجيل امتحانات الطلبة فى اليوم دا لحد يوم 22 من الشهر و كل دا و صبرنا , لان دا شىء متوقع من دولتنا الجميلة . اجازة بالغصب و نظافه متوقعة و كل شىء من برا هلاهلا و من جوه يعلم الله . المهم بقى التعليقات الاكثر استفزازا بعد خطاب الرئيس المبجل أوباما , تعليقات سخيفة لا تنم الا على سطحية تفكير كثير من الناس . الناس كانت بتسقف كتير فى الخطاب بعدد 33 مره تقريبا عشان الشعب مصرى اصله طيب , مكنش متوقع ان الرئيس يبدأ كلامه بالسلام عليكم او يقول بعض الايات القرآنيه فى خطابه , امال كنتم عايزين يجى يقول ايه و هو جى يوجه خطاب للعالم العربى الاسلامى ! بصراحه مش عارفه ايه دا اللى طيب دا سذاجه اننا سقف على اى حاجه و ننخدع فى اى حاجه .و بعدين مين دول اللى كانوا فى القاعة و بيسقفوا , المأجورين أو بكلمة احلى المدعوين للحضور . مين اللى كان حاضر , الطلبة اللى خدوا اجازة من الجامعة حتى من امتحاناتهم اليوم دا هما اللى سقفوا و لا مين بالظيط , و بعدين اللى خلا الناس تلاحظ التسقيف الرهيب دا ملحظوش ليه ان كلامه فى القضية الفلسطينيه كان دايما بيبدأ بكلمة أسرائيل و ان دل دا على شىء فيدل ان اسرائيل هى الاولوية مش العالم العربى الاسلامى . و برده مش عارفه احداث 11 سبتمبر دى هيفضلوا متعلقين فيها لحد أمتى عشان اعمال الخراب و التدمير اللى بيقوموا بيها , اشمعنا الحدث دا هما مش هينسوه و احنا لازم نسكت على المجازر اللى بتحصل كل يوم فى عالمنا العربى الاسلامى , قال هيقفل معتقل جوانتانامو و مقلش انه هيحاسب الناس اللى عذبت الناس اللى فى السجن , اشمعنى فى احداث 11 سبتمبر لازم العالم العربى الاسلامى يتعذب عشان الحدث دا . حقيقة كلام كله خداع و ضحك على الدقون . المشكلة و القضية واحدة . و اللى يزيدك ارف هو انك تلاقى ناس بعد الخطاب مقتنعه فعلا باقامة دولتين اسرائيل و فلسطين . بدأت باسرائيل زى ما الرئيس بدء و زى ما الشعب هو كمان بيغلط و بيبدأ . ارض ايه اللى تتقسم و بعدين لما هو عايز يقسم الارض ما يتكرم عليهم الرئيس و يدلهم حته من ارضه يمكن يرضوا !!! و تلاقى كمان الصحفيين و اصحاب الاراء العقيمة يقولوا " مالا يدرك كله لا يترك كله " , ايه الكلام الفارغ دا , ايه المقولات اللى مش فى مكانها دى .حاجه مقززة ان الحقائق تتغير و تتبدل تحت تبريرات غريبه . خداع و خيانه .


من ضمن برده الاشياء اللى تدعو للارف فى الفترة الاخيره هى الافلام الصيفية , كباريه و فرح و دكان شحاته و غيرهم , خلاص الحمد لله الدولة كلها بقت كدا , بقت ارف , و حتى لو كانت كدا الحل فى اننا نعرض دا فى السينما عشان اللى ميعرفش يعرف تحت مبرر ان السينما تعرض الواقع . و لما السينما تفضل طول عمرها كدا امال امتى هتعرض حاجه هادفه تغير فكر الشعب دا .فعلا حاجه مقززة