Sunday, January 14, 2007

السفاح



السفاح الذى نقصده الان ليس اولمرت و لا بوش , و لكنه سفاح المعادى و مصر الجديدة.
يا خبر ابيض ؟!, فعلا فى سفاح , تعجبت كثيرا اليوم عندما سمعت هذا الخبر من صديقتى قبل الامتحان بسبب رفضها ركوب تاكسى فى منطقة المرج , بين محطة المترو و كليتنا , قائلة ان هناك سفاح و قد يكون هذا السفاح سائق التاكسى , طبعا فى اول الامر قلت لها " انتى اكيد بتهزرى , جبتى الكلام ده منين ؟!", قالت: "من صديقة لنا ساكنة فى المرج" , قلت: " بس دا اذا حقيقة كانت وسائل الاعلام اكيد ذكرت ذلك" . المهم اننى سمعت الخبر لاول مرة كأشاعة و اخذت الموضوع بضحك . خرجت من الامتحان و اذا بصديقة لنا ساكنة فى المعادى بتقول " انا بابا وصلنى لحد محطة المترو لانه خايف عليا من السفاح " , كان رد فعلى الاول :" انتى اكيد بتهزرى ", فقالت :"لا دا حقيقة ,و فى حالات فعلا فى الانعاش" , قلت:" بس وسائل الاعلام لم تنبه بذلك" , فأجابت " ما هما مكتمين على الخبر لمنع الذعر " . و لكننى مازلت الى الان لا استوعب هذا الخبر . المهم ان بعد الامتحان كان عندى مشوار , فوجد جارتنا تتصل بى و تبلغنى ان امى قلقة على و تعجبت لان امى هى التى قالت لى ان اذهب الى هذا المشوار , فالماذا تقلق ؟!, و عندما ذهبت الى المنزل وجدها فى حالة توتر شديد , و اخبرتنى انها مازالت قلقة لان اختى هى ايضا فى مشوار و لم ترجع بعد . فسألت : " لماذا هذا القلق , عشان يعنى موضوع السفاح " و قلتها طبعا و انا بهزر , و لكن وجد امى تقول " ايوه عشان السفاح ", و كان رد فعلى كالسابق , فقلت: "حضرتك عرفتى منين ؟!", امى :"اذاعوا الخبر فى التلفزيون و قالوا ان فى اربع حالات اصيبت و اولياء الامور كلهم خايفين على اولادهم و بيوصلوهم لغاية المدرسة و لكن منذ انتشار الامن لم تصب حالات اخرى و برروا ذلك ان اكيد هذا الشخص مختل عقليا" , يا خبر ابيض , هو اى مصيبة يعلقوها علي الاختلال العقلى , يعنى حادثة بنى مزار كانت من مختل عقلى و ايضا ها السفاح مختل , اللهم ارحمنا من هذا الاختلال . المهم لما اختى عادت من مشوارها , كان وجهها اصفر , فوجدت امى تقول لها : " مالك يا بنتى ", اختى :" انا ركبى سايبة ", ماما :" ليه؟" , اختى :" لانى سمعت عن السفاح من سائق المكريوباس و افتكرت انه بيهزر بس اتأكد من كلام الناس و بقيت مشية فى الشارع و كل ما اشوف خيال افتكره السفاح "ههههههههه ,
ربنا يستر و يحفظنا جميعا , و اتمنى فعلا و ادعوا الله ان هذه الظاهرة لا تطول . و تذكرت عند تيقنى من هذا الخبر قوله تعالى:
« ظهر الفساد في البر و البحر بما كسبت أيدي الناس ليذيقهم بعض الذي عملوا لعلهم يرجعون" _الروم "41"_فاللهم اغفر لنا و ارفع مقتك و غضبك عنا و اهدنا سبلنا و احفظنا بحفظك يا ارحم الراحمين


8 comments:

Anonymous said...

هاهاهاهاهاها
اصاب اربعه و سموه سفاح والله حاجه تضحك
امال الي يغرق الف مواكن غلبان والي الي اتسبب في كوارث لقطارات والي بيبيع دم ملوث
كل دول نسميهم ايه
اعتقد نسميهم مناضلين

محمود said...

تسميهم الحزب الوطني

moslma said...

السلام عليكم
واحد من الناس
طبعا نسميهم مناضلين , انت مش بتشوف ازاى كل يوم بيطلعوا فى التلفزيون و يدافعوا عن انفسهم و خاصة موضوع اكياس و بيع الدم الملوث , يعنى نضال ما بعده نضال, عايز اكتر من النضال ده ايه

محمود
ازاى تقول الاسم الحركى لحزب السفاحين , قصدى المناضلين

whyme said...

بينى و بينك انا اول مره اسمع الحكايه دى منك

بس اهم حاجه تطمنينا عليكى اول باول علشان نطمن انا السفاح موصلش عندكم

تحياتى

مـحـمـد مـفـيـد said...

الحكومه بتدور علي اي حد
علشان يقولوا السفاح طلع مختل
والله الواحد مش عارف يعمل ايه في المسرحيه دي

Anonymous said...

قتل اعداد قليلة وسمى سفاح امال الى قتلوا الالاف وباوا ابطال او هربوا بالاموال يبقوا ايه

Anonymous said...

ربنا يسطر من اللى جى

الواحد بقى حتة خايف من نفسة

اة يا زمن

تحياتى

moslma said...

whyme
فعلا فى ناس كتير لم تسمع بهذا الموضوع,و متقلقش ربنا حفيظ ستار , عالعموم اذا دخلت المدونة و لم تجد كتابات لى اعرف انى انتقلت الى رحمة الله و السفاح وصل

نورت المدونة

محمد مفيد
اهلا بحضرتك
الحكومة لو تطول تطلع الناس كلها سفاحين و هى ملائكة هتعمل

هند
فينك؟نورتى المدونة
و بعدين احنا اتفقنا دول نسمهيم مناضلين

tamer
فعلا , ربنا يستر من اللى جى

نورت المدونة