عيد مش مبارك

بكرة الوقفة و بعده العيد و كل سنة و انتوا بخير
بكرة بأذن الله الوقفة
بكرة يوم عرفة
و عن صيامه رسولنا "صلى الله عليه وسلم "قال
صيام يوم عرفه أحتسب على الله أن يكفر السنة التي قبله والسنة التي بعده

و قال كمان

((مَا مِنْ يَوْمٍ أَفْضَلُ عِنْدَ اللَّهِ مِنْ يَوْمِ عَرَفَةَ، يَنْزِلُ اللَّهُ تَعَالَى إلَى سَمَاءِ الدُّنْيَا فَيُبَاهِي بِأَهْلِ الْأَرْضِ أَهْلَ السَّمَاءِ)) وفي رواية: ((إنَّ اللَّهَ يُبَاهِي بِأَهْلِ عَرَفَةَ مَلَائِكَتَهُ، فَيَقُولُ: يَا مَلَائِكَتِي، اُنْظُرُوا إلَى عِبَادِي، قَدْ أَتَوْنِي شُعْثا غُبْرا ضَاحِينَ)).

و كمان
ما من يوم أكثر من أن يعتق الله فيه عبدا من النار من يوم

أما عن الذكر قال

أفضل ما قلت أنا والنبيون عشية عرفة لا إله إلا الله وحده لا شريك له له الملك وله الحمد وهو على كل شيء قدير ).
استغلوا الفرصة و ادعوا بأى لغة و بأى صوت
ادعوا و انتوا واثقين متوكلين مش خايفين متواكلين

عيد سعيد عليكم
مش مبارك
و السنة الجاية بأذن الله نكون على عرفات
متوحدين على كلمة واحدة
فى صف واحد

عيد سعيد عليكم
و مش مبارك
هو مكتبة هنقول عليها مكتبة مبارك
دا عيد
بعنى محدش هيملكه و لا يورثه
عيد سعيد عليكم

عيد سعيد عليكم
و متنسوش اخوانا المحاصرين
من الدعاء و التبرعات و مساعدتهم بكل الوسائل

و فى حملة ممكن تعرفوا تفاصيل عنها اكتر من النت اسمها "الجلود لهم"
اى جلود الاضاحى للمحاصرين فى رفح

عيد سعيد عليكم مش مبارك
رغم غلاء الاسعار
و ارتفاع اسعار اللحمة
مش لازم تكلوا لحمة
انا مش هاكل لحمة
اصل الدكتورة قالتلى انى عندى املاح بسبب اللحمة
هههههههههه
دا كلام برده
هو حد دلوقتى بياكل لحمة اصلا

عيد سعيد عليكم رغم الصهاينة و الامريكان
كل عيد بيحاولوا انه يكون مش سعيد
العيد اللى فات كان الضحية صدام
و العيد دا ضحيته اهلنا المحاصرين فى غزة
بس منسناش صدام و لا هننسى المحاصرين فى بقاع الارض
و ربنا يثبتهم و يكون العيد دا أمل ليهم فى نصر قريب

عيد سعيد عليكم يا ابناء المعتلقين

عيد سعيد عليكم
رغم من اراد حزنكم
رغم من اراد ان يشعركم بالضياع
عيد سعيد عليكم
مش بقولها استهزاء او تهاون بظروفكم
و لكن تحدى بمن اراد ذلكم
و انتم اعزة تستحقون قول
عيد سعيد عليكم

عيد سعيد عليكم يا امهاتنا و ابائنا فى دار المسنين
عيد سعيد عليكم يا اخواننا المرضى
ربنا يشفيكم و يعافيكم
عيد سعيد عليكم اخواتى الايتام

عيد سعيد عليكم
انزلوا صلوا
و قولوا الله اكبر بعلو صوتكم
قولوها و متخفوش
قولوها بيقين
قولوها بعمل
بس متسفروش شرم عشان تقولوها و انتوا خايفين

عيد سعيد عليكم
طبعا مش هقدر اطالبكم بالعدية
عشان عيد اللحمة مفهوش عدية
ايديكوا على اللحمة بقى
عيد سعيد عليكم و على الأمة كلها