مش عارفه اضحك و لا ابكى يا رمسيس

السلام عليكم
شاهدت بالامس نشرة اخبار , فاحببت ان انقل لكم جزء منها بالرغم من الاخبار السيئه التى بها الا ان بها اشياء مفرحه , كانت المذيعه بتتكلم عن نقل تمثال رمسيس , و ان الحمد لله التمثال تم نقله بنجاح بعد ان قضى نصف قرن فى مكانه هذا و سيقضى ما بقى فى المتحف المصرى الكبير الذى لم يتم بناؤه بعد , بصراحه صعب عليا ازاى دلوقتى هقدر اروح لميدان رمسيس و مشفهوش , ازاى هو كمان مش هيشوف الناس الى بيشوفها كل يوم , يعنى هيقضى بقيت عمره وحيد فى الهو , معلش بقى , ولى اسعدنى جدا انهم نقلوا التمثال قبل بناء المتحف عشان ينظفوه , بصراحه فرحت قوى , اخيرا رمسيس هيتنظف, بس ياترى هينظفوه بجنسون عشان بيبقى ناعم على البشره و لا هينظفوه بمنتج مصرى , بصراحه مش عارفه . المهم بقى فى الموضوع ده كله ان فى اشاعه بتقول ان احتمال الميدان يتحول اسمه من رمسيس الى مبارك , هما المسئولين لم يصرحوا بذلك و لكن يا ترى لو ده حصل , يعنى هنلاقى سواق الميكروباس بينادى , مبارك مبارك مبارك , بدل رمسيس رمسيس رمسيس , بصراحه فعلا حاجه تفرح و خاصة ان الاصوات الهاتفه لريس مش كتير الان , فكده كده هيبقى عليهم انهم يقولوا اسمه , و يسلام كمان لو يحطوا تمثال لريس مبارك بدل رمسيس , بجد مش هقدر امسك نفسى سعتها من الفرح . بصراحه كمان حسيت بلحظه وطنيه جميله و الناس كلها كده رفعه علم مصر و كأنهم انتصروا و حرروا بيت المقدس , ياه فعلا شعور جميل , و كانت الكلمه النهائيه ان الملك رمسيس هيقضى ما بقى فى المتحف المصرى الكبير , بصراحه بقى لسانى مقدرش يقول غير استغفر الله, لا ملك الا الله , اه مانا يعنى مش فى كل حاجه كده هبقى مبسوطه . و قعد احلم بقى يسلام كده لو ينقلوا حاجه تانيه , بس متهيئلى انهم لو هينقلوا حاجه تانيه فهينقلوها لما سوريا تضرب , اه , عشان الناس فى موضوع لبنان شغلت نفسها اكتر من الازم , فقالوا لأ بقى نفكرهم شويه بتاريخهم و مجدهم , فانا شايفه ان النقله التانيه ممكن لما سوريا تضرب , المهم انى مش عايزه اشغل نفسى الان بالنقله التانيه , و مش عايزه اخرج من لحظة الفرح دى , طبعا انتم فاهمين لحظة الفرح دى .