فاصل اعلانى

السلام عليكم
لقد كنت اشاهد برنامج و جاء الفاصل الاعلانى , بصراحه ان دل هذا الفاصل الاعلانى على شىء فانما يدل على السطحيه فى التفكير و تفاهة العقول و الجرى وراء الشهوات , تسألون لماذا ؟ اقول اننى شاهد فى هذا الفاصل العجيب , اعلانات عن الاكل بجميع انواعه و اعلانات عن معجون الاسنان و اعلانات عن التليفونات المحمول و خطوطها و فى عامل مشترك بين هذه الاعلانات جميعا و هى اتصالها بشهوات الانسان , يعنى تجد فى اعلان معجون الاسنان الولد بيضع المعجون عشان يعجب البنت و اعلانات الشامبو كذلك , يعنى هو الواحد مثلا مينفعش يبقى نظيف لذاته , يعنى مثلا لو مفيش بنت عشان يضع الولد لاجلها ما يضع او العكس , الناس مش هتبقى نظيفه , عجبى , اما بقى اعلانات المحمول فتجد الولد بيشحن ليكلم البنت, كأن الكلام خلص و الناس خلصت و مفيش غير البنت دى يعنى الى يكلمها , و ما لم اكن اتوقعه اجده فى اعلان الزبادى ! , ان ولد و بنت بيكلموا بعض فطلعت البنت علبة الزبادى , قال يعنى هى بتحب الزبادى اكتر منه , طاب سمنة النخلتين و قولنا ماشى لكن توصل للزبادى , لا اله الا الله , و مش كده و بس تلاقى برده مساحيق الغسيل فيها نفس الموضوع , طاب علاقة الحب ايه بالغسيل و الاكل و المعجون و المحمول و الكلام ده كله ايه معرفش , و كأن معنى الحب متمثل فى هذه الاشياء التى افسدت عقول الشباب , و الفكر ده جعل الناس اكثر سطحيه و لا مبالاة بشؤنهم و شئون امتهم , و لعل هذا غرض من اغراض هذه الاعلانات التافه السطحيه , بصراحه لما رأيت هذا الفاصل تذكرت قصة لسقوط الاندلس , ان الاعداء من حين لاخر كانوا بينظروا الى اهتمامات الشباب , ففى مرة وجدوا مشادة , فسألوا عنها فوجدوا سببها عن ترتيب حديث فى البخارى , فقالوا ان هذه الامة لن تهزم الان , فجاؤا بعد فترة ووجدوا ان الناس مازلت تتكلم فى قضايا العلم و الدين و مرت الايام و جاؤا مرة اخرى فوجدوا شاب يبكى فسألوه لماذا تبكى ؟ فقال : لقد تركتنى رفيقتى , فعندئذ قال الاعداء ان هذا هو الوقت لسقوط الاندلس و دخلوا الاعداء و تحولت الاندلس الى بحر من الدماء بعد ازدهار دام فيها لحوالى ثمانية قرون , لا اعلم ان كان وصلكم المغزى من هذه القصة ام لا , و لكننى ارجو ان يكون وصل , لان هذا هدف من اهداف هذه الاعلانات , بصراحه الواحد لو عليه لا يريد رؤية هذه الاعلانات التافة و لكن لما تبقى الاعلانات دى وسط برنامج دينى او ثقافى الواحد سعتها يعمل ايه ؟!,يقوم احسن من قصاد الاعلانات دى او يخفض صوت التلفاز الى ان تنتهى , حد عنده حل تانى ؟.