التوك توك

السلام عليكم
بصراحه هو ده الى كان ناقص , التوك توك , اصل احنا زى ما انتو عارفين شوارعنا جميله و مفهاش تكدس اطلاقا و لا فيها زحام و لا حاجه و كان ناقص علينا التوك توك الى يملى علينا شوارعنا , و للاسف انه موجود بكثرة فى مناطق كالاسواق و ما شابهها , يعنى المناطق الى هى اصلا محدش بيعرف يمشى فيها , الواحد فى الاول قال يالا خلى الناس تاكل عيش مهو برده غصب عنهم مفيش شغل , لكن يوصل الى هذا الحد الذى انتشر به فى كثير من الاماكن , هذا فعلا امر لا يحتمل , مش عارفه يعنى هى الناس لو مشيت شارع طويل شويه هتخس , هو صحيح بيريح الكثير من كبار السن و كمان سعات بينجد الناس لما تكون الوسائل الاخرى زحمه و الحكايه مش ناقصه تأخير , فالانسان سعتها بيركبه , و لكن هل هو الحل الوحيد لذلك و خاصة ان معظم الى بيركبوا فيه شباب مش كبار السن و ان الانسان مش دايما يعنى متأخر , النقطة الاخرى اننا نجد سائق التوك توك معلى التسجيل فيه على الاخر و ماشى بيه , يعنى هو اصلا حاجه كده ملهاش شكل و كمان طالع منها صوت عالى جدا , و هو ده بقى الى كان ناقص , لاننا عايشين فى هدوء قاتل كما تعلمون و كان ناقص تسجيلات التوك توك العاليه , ده غير ان السائقين بيستغلوا حجمه فى دخول شوار داخليه ضيقه بيبقى الواحد اصلا ماشى فيها بالعفيه . فى النهايه للتوك توك ايجابيات و سلبيات و لكن هل ايجابياته تكفى لتغطى على سلبياته , و هل مصر اصلا بشوارعها هذه تصلح بان تكون مكان لاستقبال وسيلة نقل جديده , يعنى مثلا منطقة كشبرا الخيمه او العمرانيه او الطالبيه تصلح لهذا المشروع , يعنى مثلا فى اكتوبر الموضوع ماشى شويه لان شوارع اكتوبر شبه خاليه , غير انها واسعه و الناس ماشيه براحتها ووسائل المواصلات هناك مش كثيره , فهل سيأتى اليوم الذى ستسمح فيه ادارة المرور بمنع التوك توك فى مكان و جعله ممكن فى مكان اخر , و ان كنت على ما اعلم ان ادارة المرور مازلت لم تقيم هذا الشىء , هل هو موتسيكل ام عربيه و هل شرط الذى سيركبه يكون سائق ام لا , يعنى دلوقتى لو التو ك توك ده قتل حد لا قدر الله , الشخص ده هيروح هدر لان السائق هيهرب و التو ك توك معلهوش نمرة , قد تقولوا انى كبرت الموضوع و اعطيته اكثر من حقه و لكننى حاولت فقط ان انظر له من جميع جوانبه التى اراها.